Foto: Tonje Kildal / Noregs Mållag
Onsdag 30. september fekk samferdsleminister Kamzy Gunaratnam (Ap) eit nynorsk-førarkort frå Noregs Mållag. Med den symbolske overrekkinga vil organisasjonen løfta fram innsatsen hennar for nynorsk.
Gunaratnam har fått kritikk for å leia Samferdselsdepartementet utan sjølv å ha førarkort. Mållaget meiner engasjementet hennar for språk fortener merksemd, og nyttar debatten til å heia på henne som forkjempar for nynorsken.
Vil ha nynorsk på pensum i Oslo
– Me i Mållaget er meir opptekne av at ho har teke føring og vist at ho forstår målsaka, seier nestleiar Live Havro Bjørnstad i omtalen på nettsida til Noregs Mållag.
Organisasjonen viser til at Gunaratnam tidlegare har teke til orde for at halvparten av pensumet i Osloskulen skal vera på nynorsk. Ho har òg støtta obligatorisk sidemålsopplæring med eigen karakter, og oppmoda foreldre i Oslo om å velja nynorsk for borna frå første klasse.
Ei oppmuntring til den nye ministeren
Ifølgje Mållaget er kortet eit uttrykk for at Gunaratnam er kvalifisert til å stilla opp for nynorsken i regjeringa. Organisasjonen ønskjer henne lukke til og understrekar at han heiar på alle som engasjerer seg i målsaka.
Gunaratnam vart utnemnd til samferdsleminister 11. september. Ho har ansvar for politikken for transport av personar og gods, og for posttenester.
